Семей қаласында «Семей Водоканал» КМҚК ұжымымен Жаңа Конституция мен алдағы референдумның маңызына арналған кездесу өтті.
Кездесуге спикерлер ретінде Мұхамедқали Қасқабаев, Темірлан Бақтияров және Азат Құсайынов қатысып, Конституцияның қоғам мен мемлекет өміріндегі рөлі туралы пікірлерін білдірді.
Коалиция мүшелерінің айтуынша, Конституцияға енгізілетін өзгерістер мемлекеттік басқару жүйесін жетілдіруге, демократиялық институттарды нығайтуға және қоғамдағы әділдік пен теңдікті қамтамасыз етуге бағытталған. Ал референдум – халықтың өз таңдауын тікелей білдіретін маңызды демократиялық тетік.
Абай облыстық мәслихатының депутаты Мұхамедқали Қасқабаев өз сөзінде Конституция тек құқықтық құжат қана емес, сонымен қатар елдің болашақ даму бағытын айқындайтын стратегиялық құжат екенін айтты. Оның пікірінше, алдағы референдум – әр азаматтың ел тағдырына бейжай қарамай, өз азаматтық ұстанымын білдіруіне берілген маңызды мүмкіндік.
Жастардың атынан белсенділік танытқан Темірлан Бақтияров конституциялық реформалардың жастар үшін маңыздылығына ерекше тоқталды. Оның айтуынша, жаңа өзгерістер жастардың қоғамдық өмірге белсенді араласуына, олардың пікірлері мен бастамаларының ескерілуіне кең мүмкіндік береді. Бұл өз кезегінде жас буынның азаматтық жауапкершілігін арттырып, елдің қоғамдық-саяси өміріне белсенді қатысуына жол ашады. Сонымен қатар, мұндай реформалар жастардың ел болашағын қалыптастырудағы рөлін күшейтіп, олардың бастамалары мен идеяларын жүзеге асыруға қолайлы жағдай қалыптастырады.
Ал коалиция мүшесі Азат Құсайынов референдумның маңыздылығын атап өтіп, «халықтың саяси белсенділігі мен азаматтық жауапкершілігі мемлекеттің тұрақты дамуының негізгі факторларының бірі» екенін жеткізді. Ол әр азаматтың дауысы елдің ертеңін айқындауда маңызды рөл атқаратынын айтып, тұрғындарды референдумға қатысуға шақырды.
Кездесу барысында қатысушылар өз пікірлерін білдіріп, спикерлерге сұрақтарын қойды.
Іс-шара соңында коалиция мүшелері жиналғандарды алдағы референдумға белсенді қатысып, елдің болашағына бейжай қарамауға шақырды.
