«Мұтылғанның тағдыры» сайысы ұйымдастырылды.
Абайдың «Жидебай-Бөрілі» мемлекеттік қорық-музейі өткен жылы Елбасы жолдауында 2019 жылды «Жастар жылы» деп жарияланған сәтінен бастап, бірқатар шараларды жүзеге асыруда.
— Сол шаралардың жалғасы — Шәкәрім Құдайбердіұлының өмірі мен шығармашылығына арналған «Мұтылғанның тағдыры» атты сайыс, — деді музей директорының орынбасары Мейрамгүл Қайрамбаева, — аталмыш шараға Нұрсұлтан Назарбаевтың қатысуымен ашылған жастар жылының салтанатты рәсіміне қатысқан жерлесіміз, жас ақын, «Дарын» мемлекеттік жастар сыйлығының лауреаты Мерей Қарт білім сайысының құрметті қонағы ретінде қатысты. Жастарға өзінің ақжарма тілегін жеткізді. Сондай-ақ, үміттерін үкілеп келіп отырған сайыскерлерге сәттілік тіледі.
Дәстүрге айналған дүбірлі сайысты өткізудегі басты мақсат – Абайдың ақын шәкірті, жазушы, тарихшы, аудармашы, философ, сазгер Шәкәрім Құдайбердіұлының өмірін, оның мұрасын жасөспірімдер арасында терең білуге ынталандыру және кеңінен насихаттау. Сайысқа алдын-ала тағайындалған әділ қазылар құрамында Абайдың «Жидебай-Бөрілі» мемлекеттік қорық-музейі директорының ғылыми жұмыстар жөніндегі орынбасары М.Қайрамбаева, Шәкәрім атындағы гиназияның қазақ тілі мен әдебиеті пәнінің мұғалімі А.Бекқасымов, қалалық білім бөлімінің әдіскері Н.Байсарина болды.
Абайдың мемлекекеттік қорық музейі баспасөз қызметінің хабарлауынша, сайыс қорытындысы бойынша І-орынды Жарқын мектебінің оқушысы Е.Мотышева, ІІ-орынды Знаменка мектебінің оқушысы Е.Файзуллаев, ІІІ-орынды №49 мектеп оқушысы Н.Амангелді қанжығаларына байлады. Сайыста көрермендерді өз өнерімен тәнті қылып, көзге түскен №23 мектеп оқушысы А.Серікқазинова «Көрермен көзайымы» номинациясына ие болды. Сайысқа қала және өңіріміздегі мектеп оқушылары қатысып, бақтарын сынады. Жеңімпаздар дипломдар және бағалы сыйлықтармен марапатталды.
Марат Айболов
